मुंबई : सर्व सरकारी बँकांनी एकत्र येऊन आगामी काळात ग्राहक टिकवण्यासाठी आणि तो वाढवण्यासाठी बँकेलाच त्याच्या दारात घेऊन जाण्याचे बुधवारी जाहीर केले. पीएसबी अलायन्स असे याला नाव देण्यात आले असून त्याचे उद्घाटन केंद्रीय अर्थमंत्री निर्मला सीतारामन यांच्या हस्ते आभासी परिषदेत झाले. यासाठी ईझ ३.० हा कृती आराखडाही अर्थमंत्र्यांनी बँकांच्या प्रमुखांसमोर ठेवला. यावेळी पीएसबी अलायन्सविषयी इंडियन बँक असोसिएशनचे अध्यक्ष आणि भारतीय स्टेट बँकेचे अध्यक्ष रजनीश कुमार यांनी माहिती दिली. या आभासी परिषदेला अर्थसचिव राजीव कुमार, केंद्रीय अर्थ राज्यमंत्री अनुराग सिंह ठाकूर आदी उपस्थित होते.
बँक आपल्या दारी अंतर्गत सरकारी बँका नियमित तत्त्वावर देत असलेल्या सर्व सुविधा ग्राहकाच्या थेट त्याच्या दारात जाऊन देणार आहेत. यासाठी सुयोग्य तंत्रज्ञानाचा स्वीकार या बँका करणार आहेत. यामुळे क्रेडिट@क्लिक, डायल-अ-लोन, बँकिंग-ऑन-द-गो यांसारख्या योजना राबवता येणार आहेत. हा सर्व उपक्रम सार्वजनिक (सरकारी) बँक सुधारणा २०२०-२१ अर्थात ईझ ३.० अंतर्गत राबवला जाणार आहे. केंद्रीय अर्थमंत्री निर्मला सीतारामन यांच्या हस्ते या सुविधेचे उद्घाटन झाले. त्यावेळी सरकारी बँकांच्या २०१९-२० मधील ईझ सुधारणांचा अहवालही प्रकाशित करण्यात आला. यावेळी सीतारामन म्हणाल्या, बँकांनी क्रेडिट रेटिंग एजन्सींच्या अहवालांवर विसंबून न राहता बँकांनी त्यांच्या ग्राहकांबरोबर प्रत्यक्ष संवाद साधण्यावर भर द्यावा. ग्राहकाशी थेट संबंध प्रस्थापित करताना योग्य ते तंत्रज्ञान वापरण्याची आणि केवळ तंत्रज्ञानाच्या दुव्यावर अवलंबून न राहण्याची गरज आहे.
पीएसबी अलायन्स देणार या सेवा –
देशातील निवडक शहरांतून थेट ग्राहकापर्यंत जाताना सरकारी बँकांचा हा अलायन्स धनादेश गोळा करणे, प्राप्तिकरमाफी प्रमाणपत्र देणे, प्राप्तिकर चलन घेणे, ड्राफ्ट घेणे, खात्याचे पत्रक काढून देणे अशा सुविधा दिल्या जाणार आहेत.
बँकांनी अशी केलीय तयारी –
बँक सुविधा
युको बँक– अॅप, पोर्टल व कॉल सेंटरद्वारे ग्राहकांपर्यंत पोहोचणार
स्टेट बँक -छोट्या व्यावसायिकांना शिशु-ए-मुद्रा य़ोजनेअंतर्गत ५० हजार रुपयांपर्यंत कामकाज भांडवलासाठी तत्काळ कर्ज देणार, हे कर्ज अॅपद्वारे मंजूर केले जाणार, शाखास्तरावर हेच कर्ज एक लाख रुपयांपर्यंत मंजूर केले जाणार
युनियन बँक ऑफ इंडिया – आगामी आर्थिक वर्षापासून एमएसएमईंना ५० कोटी रुपयांपर्यंतचे कर्ज संपूर्णतः डिजिटल पद्धतीने देणार व त्यासाठी अॅप वापरणार
बँक ऑफ बडोदा– टॅबलेट आधारित टॅब बँकिंग सेवा देणार. यामध्ये नवे खाते उघडण्यासारख्या सुविधा ग्रामीण स्तरावर देऊ करणार. याद्वारे दरदिवशी १० हजार नवी खाती उघडली जाणार. याखेरीज टॅबच्या साह्याने कर्जासाठी अर्ज स्वीकारणे, कर्ज वितरित करणे आणि बिगरबँक -वित्तसंस्थांबरोबर भागीदारी करून कर्जवसुलीत साह्य करणे ही कामे केली जाणार
सिंडिकेट बँक -मायक्रो एटीएम व टॅब बँकिंग सुविधा देणार. महिला उद्योजकांना सूक्ष्मवित्त पुरवठ्यांतर्गत तत्काळ कर्ज वितरण करणार
