जळगाव : ‘देवेंद्र फडणवीस यांना बिहार विधानसभा निवडणुकीची जबाबदारी सोपवण्यात आली आहे. पण त्यांनी महाराष्ट्रात तिकीट वाटपात जसे राजकारण केले तसे बिहारमध्ये करू नये’, असा टोला भाजपचे माजीमंत्री एकनाथ खडसे यांनी देवेंद्र फडणवीस यांना लगावला.
भुसावळ येथील भाजप कार्यकर्ते प्रा. डॉ. सुनील नेवे यांनी एकनाथ खडसे यांच्या राजकीय जीवनावर लिहिलेल्या ’जनसेवेचा मानबिंदू : एकनाथराव खडसे’ या पुस्तकाचा प्रकाशन सोहळा गुरूवारी दुपारी मुक्ताईनगर येथे खडसेंच्या फार्महाऊसवर ऑनलाइन पद्धतीने पार पडला. या सोहळ्यानंतर खडसे पत्रकारांशी बोलत होते. एकनाथ खडसे पुढे म्हणाले की, फडणवीस यांना बिहार विधानसभेच्या निवडणुकीची जबाबदारी सोपवण्यात आली आहे. त्यांना माझ्या शुभेच्छा आहेतच. बिहारमध्ये नितीश कुमार आणि भाजपात युती आहे. त्यामुळे आमचे सरकार येईल, अशी आशा करतो. पण देवेंद्र फडणवीस यांच्याकडून एकच अपेक्षा करतो, त्यांनी महाराष्ट्रात जे राजकारण खेळले, याचे तिकीट कापायचे, त्याचे तिकीट कापायचे, याला पाडण्यासाठी प्रयत्न करायचे, त्याला पाडण्यासाठी प्रयत्न करायचे, असे तिथे होऊ नये, अशा शब्दांत एकनाथ खडसे यांनी फडणवीस यांना चिमटा काढत आपली नाराजी बोलून दाखवली. दरम्यान, एकनाथ खडसे यांच्यावर पुस्तक आलं असलं तरी खुद्द खडसे यांनीही एका पुस्तकाची घोषणा आधीच केली आहे. देवेंद्र फडणवीस यांच्याविरुद्ध गेले काही दिवस मोहीम उघडणारे खडसे ’नानासाहेब फडणवीसांचे बारभाई कारस्थान’ हे पु्स्तक लिहून त्यात फडणवीसांविरुद्ध अनेक गौप्यस्फोट करणार आहेत. हॅकर मनीष भंगाळेने रात्री दीड वाजता कृपाशंकर सिंह यांच्यामार्फत घेतलेली भेट, विधानसभा निवडणुकीत झालेली तिकिटांची कापाकापी यावरून खडसे यांनी फडणवीस यांच्यावर उघड हल्ला केला आहे. मी मुख्यमंत्रिपदाचा दावेदार असेन हे लक्षात येताच फडणवीसांनी माझ्याविरुद्ध अनेक षडयंत्रं रचली असा थेट आरोपही खडसेंनी केला आहे. या आरोपांच्या मालिकेत आज आणखी भर टाकत खडसेंनी पुन्हा एकदा फडणवीसांना लक्ष्य केलं. स्वपक्षाचा नेता उघड आरोप करत असताना फडणवीस यांनी मात्र या सर्वावर मौन बाळगलं आहे. फडणवीस यांनी खडसेंच्या आरोपांवर कोणताही प्रतिक्रिया दिलेली नाही. त्यामुळे येत्या काळात ही खदखद अधिक वाढण्याची चिन्हे आहेत. महाराष्ट्र भाजपात त्यातून मोठा कलह निर्माण होण्याचीही शक्यता आहे.
