बीड, दि. 24 (लोकाशा न्यूज) : दोन दिवसांपूर्वी वडिलांना फोन करून रडत रडत तिने माहेरी घेऊन जाच होत असल्याचे सांगितले होते. वडिलांनी तिची समजूत काढून ईदला घ्यायला येईल असे वचन दिले होते. मात्र, नवविवाहितेच्या जाचाला शेवट वाईटच झाला. तिसर्‍या मजल्यावरून फेकून तिचा खून केल्याच्या आरोपावरून पती, दीर व जाऊविरुद्ध गुन्हा दाखल करण्यात आला आहे. शहरातील शिवाजीनगर ठाणे हद्दीत 24 मार्च रोजी ही घटना उघडकीस आली.
यासमीन शकूर शेख (21, रा. शाहूनगर, बीड) असे मयत विवाहितेचे नाव आहे.तिचे वडील रहीम शरिफोद्दिन शेख (रा. इस्लामपुरा, पेठ बीड)यांच्या तक्रारीनुसार, 26 ऑक्टोबर 2021 रोजी तिचा विवाह शकूर बशीर शेख (29) याच्याशी लावला होता. शकूर हा मिस्त्रकाम करतो. लग्न होऊन एक महिना उलटल्यानंतर यासमीनला सासरी जाच होण्यास सुरुवात झाली. 24 मार्च रोजी सकाळी 7 वाजता ती घराच्या तिसर्‍या मजल्यावरून खाली पडली असल्याचा निरोप सासरच्या लोकांनी दिला. त्यावरून ते तत्काळ तिच्या घरी पोहोचले. यासमीनला तिसर्‍या मजल्यावरून फेकून संपविल्याचा आरोप त्यांनी केला. त्यावरून पती शकूर बशीर बेग, दीर शेख नसीर बशीर, जाऊ सोफेया नसीर शेख विरुद्ध खुनाचा गुन्हा दाखल करण्यात आला आहे. तपास उपनिरीक्षक बाळराजे दराडे करत आहेत.
पतीला ठोकल्या बेड्या
उपाधीक्षक संतोष वाळके,शिवाजीनगर ठाण्याचे पोलीस निरीक्षक केतन राठोड, उपनिरीक्षक बाळराजे दराडे व सहकार्‍यांनी घटनास्थळी धाव घेतली. पंचनामा करून मृतदेह उत्तरीय तपासणीसाठी जिल्हा रुग्णालयात पाठविला. पती शेख शकूर यास ताब्यात घेतले आहे. नातेवाईकांनी पोलीस ठाण्यात गर्दी केली होती.
