परळी वैजनाथ ।दिनांक १६।
भाजपच्या राष्ट्रीय सचिव पंकजाताई मुंडे यांच्या पत्राची तसेच प्रत्यक्ष भेटीची मुख्यमंत्री एकनाथ शिंदे यांनी दखल घेतली असून १३३ कोटीच्या वैद्यनाथ तीर्थक्षेत्र विकास आराखडयाला चालना दिली आहे. या आराखड्याच्या वाढीव मंजुरीस त्यांनी मान्यता देण्याचे संकेत दिले आहेत.
पंकजाताई मुंडे बीडच्या पालकमंत्री असताना सुधीर मुनगंटीवार राज्याचे अर्थमंत्री होते.
पंकजाताई मुंडे यांनी वैद्यनाथ ज्योर्तिलिंगापैकी एक असलेल्या प्रभू वैद्यनाथाच्या तीर्थक्षेत्र विकासाचा ध्यास घेतला होता, त्यांनी यासाठी सरकार दरबारी प्रयत्न करून तीर्थक्षेत्र विकासासाठी १३३ कोटी ५८ लक्ष रुपयाचा विकास आराखडा मंजूर करून घेतला होता. या आराखड्यातील कामांसाठी त्यावेळी ३५ कोटी रुपयांचा निधी देखील पुरवणी मागणीव्दारे उपलब्ध झाला होता. याच निधीतून २० कोटीच्या भक्त निवासाचे बांधकाम सध्या प्रगतीपथावर आहे.
दोन वेळा घेतली मुख्यमंत्र्यांची भेट; पत्राची घेतली दखल
हा आराखडा जशास तसा मंजूर करावा आणि त्याला गती द्यावी अशी मागणी पंकजाताई मुंडे यांनी गतवर्षी ऑक्टोबर व नोव्हेंबर महिन्यात मुख्यमंत्री एकनाथ शिंदे यांना प्रत्यक्ष भेटून केली होती. आज मुख्यमंत्र्यांनी त्यांच्या दालनात सर्व संबंधित मंत्र्यांसह बैठक घेऊन या आराखड्याला चालना दिली असून वाढीव आराखडा देखील मंजूर करण्याचे संकेत दिले आहेत. दरम्यान, परळीच्या तीर्थक्षेत्र विकासाला गती देण्याची कार्यवाही सुरू केल्याबद्दल पंकजाताईंनी मुख्यमंत्र्यांचे आभार मानले आहेत.
••••
