मुंबई ।दिनांक १३।
सामान्य कुटुंबातून पुढे येणाऱ्या आणि निसर्गदत्त गोड आवाजाची दैवी देणगी लाभलेल्या शामल सौंदरमल या गुणी गायिकेच्या कलेला भाजपच्या राष्ट्रीय सचिव पंकजाताई मुंडे यांनी वाव दिला आहे. महामानव डाॅ. बाबासाहेब आंबेडकर यांच्या जयंतीच्या पार्श्वभूमीवर त्यांनी तिने गायलेल्या गीताचा व्हिडिओ ट्विटरवर शेअर केला आहे. उद्या तिचे गाणे रिलीज होत आहे.
वडवणी (जि. बीड) तालुक्यातील मुळ रहिवासी असलेली शामल सौंदरमल व तिचे कुटुंब सध्या मुंबईत वास्तव्यास आहे. अत्यंत सामान्य कुटुंबातील शामल व तिची आई किशाबाई या दोघींनाही गोड आवाजाची दैवी देणगी लाभलेली आहे. शामलचा आवाज ऐकल्यानंतर पंकजाताई मुंडे यांनी तिला वरळीच्या कार्यालयात बोलावून तिचा गौरव केला होता. उत्तम गुरू मिळेपर्यंत तिला त्यांनी दत्तक घेतले आहे.डाॅ आंबेडकरांवरील गीताचा व्हिडिओ
महामानव भारतरत्न डाॅ. बाबासाहेब आंबेडकर यांच्या जयंतीच्या अनुषंगाने पंकजाताई मुंडे यांनी शामल व किशाबाईंच्या कलेला वाव देत त्यांनी गायलेले ” बागेचा माळी, हाय माय जगावेगळा ” या गीताचा व्हिडिओ ट्विटरवर शेअर केला आहे. हे गाणे त्यांनी अतिशय सुंदर गायले असून काही तासांतच तो व्हिडिओ राज्यभर व्हायरल झाला आहे. या गुणी गायिकेला आशीर्वाद आणि प्रोत्साहन जरूर द्या असे देखील पंकजाताईंनी म्हटले आहे.
••••
