बीड, दि. 24 (लोकाशा न्यूज) : सण कोणताही असो पोलिसांना आणि त्यांच्या कुटूंबियांना तो साजरा करताना अनेक अडचणी येतात. दिवाळी तर असा सण आहे की पोलिसांना सुट्ट्याच नसतात..यामुळे त्यांच्या कुटूंबियांना वेगवेगळ्या अडचणींना तोंड द्यावे लागते. पोलिस आणि त्यांच्या कुटूंबियांची हीच अडचण लक्षात घेवून पोलिस अधीक्षक नंदकुमार ठाकूर, एएसपी सुनिल लांजेवार, डीवायएसपी संतोष वाळके आणि पोलिस बॉईज संघटनेचे संस्थापक अध्यक्ष राहूल दुबाले यांनी पोलिस कुटूंबियांसोबत दिवाळी साजरी केली. सोमवारी सकाळी शहरातील पोलिस कॉलनीमध्ये राहूल दुबाले यांच्या पुढाकारातून एक छोटे खानी कार्यक्रम झाला. या कार्यक्रमाला उपस्थित राहून पोलिस अधीक्षक नंदकुमार ठाकूर, सुनिल लांजेवार आणि डीवायएसपी संतोष वाळके यांनी पोलिस कुटूंबियांचा आनंद वाढविला.
पोलिस बॉईज संघटनेचे अध्यक्ष राहूल दुबाले हे पोलिसांसाठी त्यांच्या प्रश्‍नांसाठी मोठा लढा देत आहेत. त्यांच्या याच लढ्यामुळे बीडसह महाराष्ट्रातील पोलिसांचे प्रश्‍न सहजपणे मार्गी लागत आहेत. अगदी आपल्याप्रमाणेच सर्व पोलिस कुटूंबियांची दिवाळी गोड व्हावी यासाठी त्यांनी पुढाकार घेतला त्याअनुषंगानेच काल त्यांनी येथील पोलिस कॉलनीमध्ये एक छोटेखानी कार्यक्रम घेतला. त्यांनी केलेल्या प्रयत्नामुळे स्वत: बीडचे पोलिस अधीक्षक नंदकुमार ठाकूर, एएसपी सुनिल लांजेवार, डीवायएसपी संतोष वाळके यांनी पोलिस कॉलनीमध्ये येवून दिवाळी साजरी केली. यावेळी पोलिस कुटूबियांना त्यांच्या हस्ते फटाके आणि फराळाचे वाटप करण्यात आले. यावेळी पोलिस अधीक्षक नंदकुमार ठाकूर,एएसपी सुनिल लांजेवार आणि डीवायएसपी संतोष वाळके यांनी पोलिस कुटूंबियांना दिवाळीचा शुभेच्छा दिला. या कार्यक्रमाचे प्रस्ताव स्वत: राहूल दुबाले यांनी केले. यावेळी पोलिस निरीक्षक विश्‍वास पाटील यांच्यासह इतर अधिकारी आणि कर्मचार्‍यांची उपस्थिती होती.
