बीड : तालुक्यातील मानकुरवाडीचे पोलीस पाटील भीमराव ससाणे ( वय ५ ९ , रा . ढेकणमोहा , ता . बीड ) यांचा डोक्यात खोरे मारून खून करण्यात आला . ही घटना गुरुवारी रात्री ८.४५ वाजता ढेकणमोह्यात घडली . याप्रकरणी गावातील एक व्यक्ती आणि त्याच्या दोन मुलांवर खुनाचा गुन्हा नोंदविण्यात आला . भीमराव ससाणे यांचा मुलगा संतोषने दिलेल्या फिर्यादीनुसार , गुरुवारी रात्री ८.३० वा . गावातील रवी मुरलीधर शिंदे हा त्यांच्या घरासमोर आला आणि भाऊ कृष्णा ससाणे याला बोलावून सोबत घेऊन गेला . थोड्यावेळाने ते दोघे परतल्यानंतर कृष्णाच्या बोटाला जखम दिसून आल्याने संतोषच्या गचुरीला धरून त्याबाबत जाब विचारला . याचा राग आल्याने तुम्हाला बघून घेतो अशी धमकी देत शिवीगाळ करत रवी तिथून निघून गेला . त्यानंतर संतोषला बीडच्या रुग्णालयात पाठवून संतोष आणि भीमराव हे घरासमोर थांबले . तेवढ्यात ८.४५ वाजताच्या सुमारास रवि मुरलीधर शिंदे , त्याचा भाऊ दिपक मुरलीधर शिंदे व त्याचे वडील मुरलीधर लिंबाजी शिंदे हे तिघे खोरे , काठ्या घेऊन तिथे आले आणि त्यांनी संतोष व भीमराव यांच्यावर हल्ला चढविला . यावेळी रवीने खोरे डोक्यात मारल्याने भीमराव जागीच कोसळले . तरीदेखील त्यांनी संतोष आणी भीमराव यांना काठीने मारहाण
सुरूच ठेवली . भांडण सोडविण्यासाठी आलेली भीमराव यांची पत्नी सुशीला यांनाही मारहाण करण्यात आली . तेवढ्यात इतर ग्रामस्थ धावत आल्याने हल्लेखोर पळून गेले . यावेळी १०८ रुग्णवाहिका बोलावली असता त्यातील डॉक्टरांनी भीमराव यांना तपासून ते मयत झाले असल्याचे सांगितले . घटनेबाबत माहिती मिळताच पिंपळनेर पोलिसांनी घटनास्थळी धाव घेतली आणि पंचनामा करून भिमराव यांचा मृतदेह शवविच्छेदनासाठी बीडच्या जिल्हा रुग्णालयात पाठवून दिला . सदर फिर्यादीवरून रवि मुरलीधर शिंदे , भाऊ दिपक मुरलीधर शिंदे आणि मुरलीधर लिंबाजी शिंदे यांच्यावर पिंपळनेर पोलीस ठाण्यात कलम ३०२ , ५०४ , ५०६ , ३४ अन्वये गुन्हा दाखल करण्यात आला .
