बीड : केज तालुक्यातील मस्साजोगचे सरपंच संतोष देशमुख यांच्या हत्येमध्ये सहभागी असलेल्या आरोपींचा शोध घेतला जात आहे, या अनुषंगानेच पोलिसांच्या रडारवर आता आरोपींचे नातेवाईकही आले आहेत, चौकशीसाठी शनिवारी आरोपींच्या काही नातेवाईकांना ताब्यात घेतले होते.
संतोष देशमुख यांच्या हत्येमध्ये राष्ट्रवादी अजित पवार गटाच्या केज तालुकाध्यक्ष विष्णू चाटे याच्यासह सातजणांचा सहभाग आढळला आहे. यातील तीन आरोपी पोलिसांनी पकडले आहेत. परंतु चार आरोपी अजूनही मोकाटच आहेत. तसेच या प्रकरणात पोलिसांच्या भूमिकेवरही संशय व्यक्त करण्यात आला होता. त्यामुळे पोलिस उपनिरीक्षक राजेश पाटील यांना निलंबितही करण्यात आले होते. असे असले तरी या घटनेमुळे सर्वत्र संताप व्यक्त केला जात होता. कायदा व सुव्यवस्थेबद्दल प्रश्न उपस्थित केले जात आहेत. याच घटनेच्या निषेधार्थ आणि या प्रकरणातील फरार आरोपींना अटक करावी, या प्रकरणाचा मागचा मास्टरमाईंड शोधावा, यातील आरोपींना कठोर शासन करावे, हे प्रकरण फास्ट ट्रॅक कोर्टात चालवावे यांसारख्या विविध मागण्यांसाठी शुक्रवारी जिल्हा बंदची हाक देण्यात आली होती. याला जिल्ह्यात सर्वत्र प्रतिसाद मिळाला.
नागरिकांतील वाढता रोष पाहून आणि आंदोलकांना दिलेले आश्वासन पूर्ण करत पोलिस अधीक्षक अविनाश बारगळ यांनी पोलिस निरीक्षक प्रशांत महाजन यांना सक्तीच्या रजेवर पाठवले आहे. तसेच चोकशी पूर्ण होताच महाजन यांना निलंबित ही केले जाणार आहे, आता केजची जबाबदारी अनैतिक मानवी वाहतूक प्रतिबंधक कक्षाचे पोलिस निरीक्षक वैभव पाटील यांच्याकडे देण्यात आली आहे. मुळचे काेल्हापुरचे रहिवाशी असलेल्या पाटील यांनी सीआयडी पुणे, अकोला आदी ठिकाणी कर्तव्य बजावलेले आहे. तसेच इतर फरार आरोपींचा शोध घेतला जात आहे, या अनुषंगाने फरार आरोपींच्या काही नातेवाईकांना पोलिसांनी चौकशीसाठी ताब्यात घेतले होते.