बीड।दिनांक २३।
गेल्या काही दिवसांपासून अहमदनगर व बीड जिल्ह्यात ड्रोनच्या घिरट्याने ग्रामीण भागातील नागरिकामध्ये भीतीचे वातावरण निर्माण झाले आहे. चोरीच्या भीतीने नागरिक रात्र जागून काढत आहेत. हा प्रकार नेमका काय आहे? याचा शोध घेऊन पोलिस प्रशासनाला संबंधितांवर कठोर कारवाई करण्याचे आदेश द्यावेत अशी मागणी भाजपच्या राष्ट्रीय सचिव आ. पंकजाताई मुंडे यांनी उप मुख्यमंत्री देवेंद्र फडणवीस यांच्यासह दोन्ही जिल्ह्याच्या एसपींकडे एका पत्राद्वारे केली आहे.
मागील एक महिन्यापासून हा प्रकार सुरू असल्याचे आढळून आले आहे. बीड जिल्ह्यातील आष्टी, बीड, गेवराई, वडवणी, धारूर यासह अहमदनगर जिल्हयातील पाथर्डी व शेवगाव तालुक्यातील अनेक गावांमध्ये अशाच पद्धतीने ड्रोन घिरट्या घालत आहेत. ड्रोन च्या माध्यमातून चोरीसाठीची रेकी करत असल्याची अफवा नागरिकांमध्ये आहे, त्यामूळे नागरिकांची झोप उडाली असून ग्रामस्थांमध्ये दहशत आणि भितीचे वातावरण निर्माण झाले आहे.
दरम्यान, हया सर्व प्रकारात आपण स्वतः गांभीर्याने लक्ष घालून हा प्रकार नेमका काय आहे? याचा शोध घ्यावा आणि नागरिकांमध्ये निर्माण झालेली भिती पोलीस प्रशासनाकडून दूर करावी तसेच सध्या दोन्ही जिल्हयातील ग्रामीण भागात रात्रीच्या चोऱ्या व दरोडयांचे प्रमाण वाढलेले आहे यासाठी रात्रीच्या गस्त घालणारे पोलीस पथक तयार करुन रात्रीची गस्त वाढवावी तसेच असे प्रकार करणारांविरूध्द कठोर कारवाई करावी आणि नागरीकांनी भयभीत होऊ नये यासाठी प्रशासकीय पातळीवर योग्य उपाययोजना कराव्यात अशी विनंती आ. पंकजाताई मुंडे पत्राद्वारे केली आहे.
••••