मुंबई ।दिनांक १४।
खासदार प्रीतम मुंडें यांच्याऐवजी मला पक्षाने खासदारकीचे तिकीट दिल्याने मनामध्ये थोडीशी संमिश्र भावना आहे. पण प्रीतम यांना मी विस्थापित करणार नाही. त्यांना फार काळ काही वाट पाहण्याची गरज पडणार नाही, अशी ग्वाही भाजपच्या राष्ट्रीय सचिव पंकजाताई मुंडे यांनी दिली. खासदारकीची उमेदवारी जाहीर झाल्यानंतर आज पत्रकारांशी संवाद साधतांना त्या बोलत होत्या. खा. डाॅ. प्रितमताई मुंडे हया देखील यावेळी उपस्थित होत्या.
कोणताही धक्का बसलेला नाही
पंकजाताई मुंडे पुढे म्हणाल्या,
माझ्या पक्षाने माझी उमेदवारी
जाहीर केली ही गोष्ट माझ्यासाठी सन्मानजनक आहे. पण थोडीशी मनामध्ये संमिश्र भावना आहे. कारण गेल्या दहा वर्षांपासून प्रीतम मुंडे या ठिकाणी चांगले काम करत आल्या आहेत. पण आमच्या दोघींपैकी कोणाला तरी तिकीट मिळेल अशी अपेक्षा मात्र नक्की होती. त्यात माझे नाव जाहीर झाल्याने कोणताही धक्का बसलेला नाही. आम्हा दोघी बहिणींमध्ये चांगला समन्वय आहे.
आमच्यात चांगला समन्वय
पंकजा मुंडे पुढे म्हणाल्या की, दुसरी गोष्ट म्हणजे नवीन जबाबदारी दिल्याने मनामध्ये थोडी हुरहुर आहे. कारण मी राज्यात काम करायचे आणि आता मला नवीन झोनमध्ये जावे लागणार आहे. मुळात राज्यात व जिल्ह्यातील राजकारणात मी धोरणात्मक निर्णय घेत असे व प्रीतम मुंडे या वैयक्तिक पातळीवर सर्व गोष्टी सांभाळत होत्या.
त्यामुळे दोन्ही बाजू सांभाळण्याचे काम यापुढेही आम्ही करत राहू यात कोणतीही शंका नाही.
राजकारण हा खडतर प्रवास
राजकारण हा मुळातच खडतर प्रवास आहे. त्यामुळे राजकीय वनवास संपला असे कधीही म्हणता येणार नाही. पदावर असल्यावर अडचणी नसतात असे मुळीच नाही त्यामुळे हा प्रवास अगदी खडतर असतो, असेही पंकजाताई मुंडे म्हणाल्या.
धनंजय मुंडेंमुळे अधिक शक्ती मिळेल
धनंजय मुंडे हे जिल्ह्याचे पालकमंत्री आहेत नॅचरली जिल्ह्यात आमचा सहभाग आहे. धनंजय मुंडे यांच्याशी माझा संवाद आहे. ते आल्यामुळे आम्हाला कोणताही त्रास होणार नाही. दुसरी गोष्ट म्हणजे अधिक मताधिक्याने आम्ही निवडून येऊ याची आम्हाला खात्री वाटते.
पंकजाताईच माझ्या नेत्या
पत्रकार परिषदेत बोलताना खासदार डाॅ. प्रीतमताई मुंडे म्हणाल्या की, पंकजा ताईच माझ्या नेत्या राहिलेल्या आहेत. त्यामुळे मला त्यांना कोणताही सल्ला देण्याची गरज नाही. नेत्यांना शिकवण्याचे दिवस अजून आलेले नाही. गेल्या पाच वर्षांपासून आम्ही सगळे वाट पाहत होतो. त्यादृष्टीने ताईंना आज उमेदवारी मिळाली त्याचा मला आनंदच आहे. सक्षम, अभ्यासू नेतृत्व या जिल्ह्याला लाभलेले आहे. माझ्यापेक्षा त्यांनी जास्त काम केंद्रातील नेतृत्वाबरोबर केलेले आहे. त्यामुळे लोकसभेत त्यांना सर्वाधिक मतांनी विजय मिळवून देणं हेच माझं टार्गेट असेल असे त्या म्हणाल्या.