बीड बसस्थानकात धुमाकूळ घालणारा चोरटा जेरबंद, स्थानिक गुन्हे शाखेची कारवाई

बीड दि.29 (प्रतिनिधी)ः शहरातील बसस्थानकामध्ये मागील काही दिवसांपासून चोरीच्या घटनेत मोठ्या प्रमाणावर वाढ झाल्याचे प्रकार समोर येत होते. बसस्थाकातील चोरट्यांमुळे प्रवाशांमध्ये भीतीचे वातावरण निर्माण झाल्याचे चित्र असताना अखेर स्थानिक गुन्हे शाखेच्या वतीने सुभाष अर्जुन गायकवाड (वय 34 रा.शिरापुर धुमाळ) या चोरट्याला जेरबंद केले आहे.
भास्कर आव्हाणे (वय 45 रा.पाणेगाव ता.अंबड) हे बीड बसस्थानकातून अंबडकडे जाण्यासाठी एका बसमध्ये चढत असताना त्यांच्या पँटच्या खिशातील नगदी एक लाखाची रोखड अज्ञात चोरट्याने लंपास केली होती. शिवाजी नगर पोलिस ठाण्यात 27 जुलै रोजी या प्रकरणात गुन्हा दाखल करण्यात आला होता. दरम्यान स्थानिक गुन्हा शाखेच्या पथकाने अवघ्या दोन दिवसात सुभाष गायकवाडला अंबिका चौकमधून ताब्यात घेतले असून त्याच्याकडून सदरची रक्कम जप्तही करण्यात आली आहे. ही कामगिरी स्थानिक गुन्हे शाखेचे पोलिस निरीक्षक संतोष साबळे, पोलिस उपनिरीक्षक श्रीराम खटावकर, मनोज वाघ, प्रसाद कदम, सोमनाथ गायकवाड, विकास वाघमारे, सचिन आंधळे, विकी सुरवसे, अशोक कदम यांच्या वतीने करण्यात आली.