एसपी नंदकुमार ठाकूर यांचा कर्तव्यदक्षपणा बीड जिल्ह्याच्या कामी येणार, हायप्रोफाईल केसवर काम करण्याचा आहे ठाकूर यांचा अनुभव, मुंबईत गाजलेल्या सोशल मीडिया फेक लाईक केसवर ठाकूर यांनी केले होते काम, केसमध्ये बॉलिवूडमधील अनेक आसामी होत्या आरोपी, मुंबईतीलच अर्णव गोसावीशी संबंधित टीआरपी घोटाळ्याचाही ठाकूर यांच्याकडेच होता तपास

ुबीड, दि. 8 (लोकाशा न्यूज) : बीडच्या रिक्त असलेल्या पोलीस अधीक्षकपदी अखेर नियुक्ती करण्यात आली आहे. नांदेड येथील मानवी हक्क संरक्षण विभागाचे पोलीस अधीक्षक असलेल्या नंदकुमार ठाकूर यांना बीडचे पोलीस अधीक्षक म्हणून नियुक्ती देण्यात आली आहे. आर.राजा यांची बदली झाल्यानंतर महिनाभरापासून हे पद रिक्त होते. सध्या या पदाचा अतिरिक्त पदभार पंकज देशमुख यांच्याकडे होता. देशमुख यांनी बीड पोलिस अधीक्षक पदाचा पदभार अत्यंत चांगल्या पध्दतीने संभाळला. विशेष म्हणजे त्यांच्या कार्यकाळातच 309 पोलिस कर्मचार्‍यांच्या प्रशासकिय बदल्या झाल्या. त्यांनी केलेल्या या बदल्यांवर सर्वच कर्मचार्‍यांनी समाधान व्यक्त केले. आता नंदकुमार ठाकूर यांची बीड पोलिस अधीक्षक म्हणून नियुक्ती करण्यात आली आहे. ते येत्या दोन दिवसात पोलीस अधीक्षक पदाचा पदभार स्विकारणार आहेत.

बीडचे पोलीस अधीक्षक म्हणून नियुक्ती झालेले नंदकुमार ठाकूर हे नाशिक जिल्ह्यातील मनमाड येथील रहिवासी आहेत. भारतीय प्रशासन सेवेतील जेष्ठ अधिकारी असून त्यांचा बराच कार्यकाळ मुंबईत गेलेला आहे. नांदेड येथे पीसीआर विभागात येण्यापूर्वी नंदकुमार ठाकूर यांनी मुंबईत अनेक हायप्रोफाईल केस सांभाळल्या आहेत. नंदकुमार ठाकूर यांनी यापूर्वी मुंबईत क्राईम ब्रांचला डीसीपी म्हणून काम पहिले आहे. जुलै 2020 मध्ये त्यांची नियुक्ती मुंबईच्या क्राईम ब्रान्चमध्ये झाली होती. त्यावेळी गृहमंत्रालयाने काढलेल्या बदली आदेशाला मुख्यमंत्र्यांनी एका दिवसात स्थगिती दिली होती आणि नंतर काही दिवसांनी पुन्हा बदली आदेश काढण्यात आले होते. त्यात नंदकुमार ठाकूर यांना मुंबईच्या क्राईम ब्रान्चमध्ये नेमणूक मिळाली होती. मुंबईत गाजलेल्या सोशल मीडिया फेक लाईक केसवर नंदकुमार ठाकूर यांनी काम केले होते. या केसमध्ये बॉलिवूडमधील काही आसामी आरोपी होत्या. त्यानंतर मुंबईतीलच अर्णव गोसावीशी संबंधित टीआरपी घोटाळ्याचा तपास नंदकुमार ठाकूर यांच्याकडेच होता. यातापासादरम्यानच त्यांची गुन्हे शाखेतून मुंबईच्या वाहतूक शाखेत बदली झाली होती. मुंबईत जाण्यापूर्वी ठाकूर यांनी जळगाव, रत्नागिरी, गोंदिया आदी ठिकाणीही काम केलेलं आहे. तसेच त्यांना अनेक सन्मान देखील मिळालेले आहेत. आता बीड जिल्ह्यातही ते अत्यंत चांगल्या पध्दतीने कर्तव्य बजावतील, असा विश्‍वास व्यक्त केला जात आहे.